Андроид системийг илүү бүтээлч ашиглах нь.

Та бидний сайн мэдэхгүй ч ажлыг асар хөнгөвчилдөг функцуудын талаар энд бичнэ. Линукс суурьтай үйлдлийн систем учраас жижиг компьютер гэхэд бараг болно... 

1. Хэрэглүүрийн товчлол үүсгэх.

Та зарим хэрэглүүрийн зөвхөн нэг хэсгийг голцуу ашигладаг бол түүнийхээ товчлолыг үүсгэчхэд л хангалттай. Хэрэглүүрийг хайж олж орсны дараа тэндээс ашиглах хэсэг рүүгээ орох гэж хугацаа алдаж байхаар ганц товчлол үүсгээд л шууд ашиглах хэсгээ ашиглаад байвал амар шүү дээ. 

Жишээ нь дээрх зураг дээр Photos хэрэглүүрийн багтаамж султгах коммандыг байнга ашигладаг бол та Photos хэрэглүүр рүү орж, тохиргоо хэсэг рүү орсны дараа жагсаасан тохиргоон дундаас багтаамж султгах гэдгийг хайж олж дарахын оронд нүүр дэлгэц дээр ганц коммандын товчлолыг гаргаад л, хэрэгтэй үедээ нэг дарчхад хангалттай гэсэн үг.

2. USB төхөөрөмж холбох.
Бараг л жижиг компьютер гэж түрүүн хэлсэн шүү дээ. Андроид үйлдлийн систем дээр та USB Flash disk, зөөврийн хард диск, кэйбоард, мауз мэтийг залгаад ямар ч асуудалгүй ашиглаж болно. Хэрвээ холбоход ашиглах хэрэглүүр нь байвал өөр төхөөрөмж ч бас залгах боломжтой гэсэн үг.

Энэхүү функцыг ашиглахын тулд танд OTG Cable (одоо ч бараг хэрэггүй болсон) хэрэгтэй. Энэхүү функцыг хүмүүс мэддэг болсноос хойш Type-C оролттой флаш диск ч худалдаанд гараад удаж байгаа.

3. Түргэвчилсэн тохиргоог нэг шудралтаар буулгаж ирэх.

Дэлгэцийн дээд хэсгээс нэг хуруугаар доош татахад мэдэгдэл хэсэг, түргэвчилсэн тохиргооны багахан хэсэгтэй цуг бууж ирдэг. Харин та нэг биш хоёр хуруугаар зэрэг татахад т.тохиргоо хэсэг бүтнээрээ шууд бууж ирнэ. Нэг их том асуудал биш боловч нэг ашиглаад сурчихсан байхад гэмгүй шүү дээ.

4. Камер руу түргэн орох.

Ихэнх утсанд түгжих товчийг түргэн хоёр удаа дарснаар Камер апп руу ордог. Мэр сэр ганц нэг утсанд өөр үйлдлээр ордог ч ихэнх утсанд энэ аргаар орж болдог учраас нэг цээжлээд авсан байхад зүгээр. Учир нь гоё агшинг буулгаж авахын тулд танд хурд хэрэгтэй шүү дээ, халааснаасаа утсаа гаргаж байх зууртаа түгжих товчоо хоёр дараад л болоо.

5. Дууны гаралтыг стерео биш моно болгох.

Хэрвээ та хос блүтүүт чихэвч хэрэглэдэг, ихэнхдээ нэг талыг нь зүүдэг бол энэ тохиргоог идэвхжүүлээрэй. Учир нь зарим дуу 2 талд хуваарилагдаж дугардаг учраас энэхүү тохиргооны тусламжтайгаар чихэвчний нэг талыг зүүж байх үедээ дууг бүтэн сонсоно гэсэн үг. Идэвхжүүлэхийн тулд тохиргоо хэсгээс "mono" гэж хайгаад л олж ороод болоо.

6. Анимэшиний хурдыг нэмэх (харагдах хурдыг багасгах)

Animation Scale гэж нэрлэх бөгөөд энэхүү тохиргоог олохын тулд та эхлээд нуугдсан байдаг хөгжүүлэгчийн тохиргоог нээх хэрэгтэй. Эхлээд тохиргоо хэсгээс Build Number дээр 7 удаа хурдан дарахад "You are now developer" гэсэн хариуг харна. Үүний дараа Developer Options дотроос Animation Scale сонголтуудын утгыг 0.5 эсвэл бүр 0 болгосон ч болно. Утас тань нэг л хурдан юм шиг санагдаад явчихна.

Source: AndroidPolice